(1933-1957) Suañando cola pluma
Cuerre un regatu per aquí cerquina
que s´acolumbra desde mio ventana
y nél finxen los rayos de la lluna
per entre los manoxos d´espadaña
cintes brillantes de cristal cuayáu
y madexines qu´asemellen plata.
Tán durmiendo tranquilos los mios fíos
cola risa esparcía pela cara
que ye´l reflexu de los anxelinos
con quien suañando tán ena so cama.
Cuasi rindía de los míos llabores
que son abondos, sin mentir migaya,
sentéme a descansar xunto a la mesa
que tengo ena salina de mio casa
y, como si fios obra d´un ensalmu
non pudí remediar la pigazada
y alcomencé a sueñar qu´unos neñinos
tirándome cadumu pela saya
cantábenme veyures a la vez
quitándose unu al otru la palabra.
Nun eren gayasperes les ñoticies
nin taben fartuquinos pela traza,
escalzos, esgamiaos, mal vistíos..
¿pa qué me buscará asta cominaya?
¡si fora rica!, dixe, ¡si tuviera!...
mas "quien tuviera", nunca valió nada.
Lo único que tengo ye una pluma,
que fai tiempo está ociosa y hai qu´usala,
-porque quiér Dios qu´acierte delles veces
aunque lo más del tiempu está sgayada-
pa escribir en mío bable costiquines
que selle, seliquín lleguen al alma.
Y suañé que coyía la mio pluma
y poqueñín a pocu l´amugaba
en mesmu corazón, y me salía
de versos duciquinos empapada.
Llueu vi que los versos esñalaben
semeyando talmente una bandada
de palombines blanques que col picu
mesmamente d´oru, en cada casa
posaben el papel que yo escribía
y semaben tenreces en el alma
d´aquellos que sobrando-yos daqué
pueden bien apartar una tayada
pa vestir y calzar a los neñinos
que nç´estaben tirando pela saya.